ياللي بغيت تعود ماعاد يمديـك
من عقب حال العذل بينك وبيني
انته تظن القلب هاويك باغيـك
يومن وقتك صايرن لك معينـي
العام امد يداي بالوصل راجيك
وانته تمد العذر دون اليدينـي
نسيت وقتن كنت انا فيه مغليك
اللي معه قضيت حلو السنينـي
عساك للي وقت حاجتك يشقيك
ياللي عليك الناس متهافتينـي
او عل دنيا عشت فيها تعنيـك
والله يسلط فوقـك الاقربينـي
ولعل فالك في همومن تصاليـك
ولا رحاً تصبح بعدها طحينـي
او عل تفقد غالين لك مقديـك
اللي علاك ارحم من الوالدينـي
تبكيه حول وترجع الناس تبكيك
وتزيد عشر اعوام عقبه حزيني
وتعيش محدن في حياتك مسليك
ويطول عمرك قرن بعد اربعيني
تذوق هم وغم محدن مراعيـك
الا المرض والجوع متقارنينـي
وتموت محدن دارين ويبكيـك
وتدفن بقاع مجدبن له سنينـي
الأحد سبتمبر 07, 2008 1:13 am
